تاج وتاج

السلام عليكم ورحمة الله وبركاته

انا اسفة جدا لتاخرى فى موضوع التاج هم الصراحة تاج وتاج

وربنا يديم علينا الهدايا بس اللى مش من النوع ده يعنى لو وردة يبقى كويس انما هنقول ايه

اه الحمد لله نبدا بقى استعنا على الشقاء بالله:

التاج الأول
أية اللي هيحصل لإيميلك لما تموت؟
أولا عمري ما فكرت في الموضوع ده بس أكيد هيتقفل ويتنسى هو وصحبته عادى موت.

أديت الباسورد لحد قبل كده؟
اه اديته قبل كده لبنت خالتى (شيماء )هى بنت خالتى واختى ومغيرتش الباسورد ولا حاجة الثقة موجودة الحمد لله
أسمك؟
أمانى

أسم الدلع اللي مشهور به وسط صحابي؟
مينو, منمن
عمرك؟
27
برجك؟
العذراء
مجال الدراسة؟
هندسة كهرباء قوى
السفر بالنسبة لك؟
غموض وخوف أكتر منه رغبة

المود بتاعي؟
بحب اضحك واهزر طول الوقتواحب العلاقات بين الناس تكون بسيطة بدون تجاوز يعنى ماحبش حد يتجوز فى الكلام لكن طالما بنقول الحق بقى الوش تانى بتاعى وحش موت وللحق برضه هو بيظهر كل فترة بعيدة لكن الصراحة تحتم انى اقول ان مامتى اللى هى مامتى بتقولى عليكى قلبة فظيعة بس انا يعنى فى اعتقادى ان ممكن يغفرى ان وشى بشوش وبضحك طول الوقت وبزعل شوية صغيرين (وعلى راى الاخت نانسى مين فينا على حاله كل الاوقات)
وقت فراغك بتعمل فيه أية؟
هو مش وقت فراغى وبس انا بحب اقرا طول الوقت يعنى قصص وروايات وكده لكبار الكتاب

الأكلة المفضلة؟
السمك ثم السمك يعنى ممكن افطر سمك واتغدى سمك من غير زهق واهو كله فسفور ومالكوش بقى ليلة الامتحان ماما عودتنا تعمل سمك علشان مخنا ينور(شعاع)
الصفات اللي أخدتها من بابا؟
الحرص ثم الحرص
الصفات اللي أخدتها من ماما؟
الطموح والصبر ومحاولة الوصول لشئ جيد والحق يعنى ماما احسن منى

أكتر ست حاجات بكرهها؟
الخيانة أصعب حاجة فى الدنيا
الكذب
حب الناس لبعضها لتحقيق مصلحة
النميمة والغيبة

كلام الناس على بعضهم يصعب عليا يكون واحد معملش اى حاجة ويتقال عليه كلام وحش وتطلع عليه سمعة وده اليومين دول بقى اسهل حاجة الناس بقيت فعلا وحشة
التملق والتودد والمحلسة وانا الحاجات دى بتقطعنى وبتستفزنى جدا

النفاق وان تظهر غير ما تبطن

أكتر ست حاجات بتحبها؟
النجاح
الاخلاص
الصداقة شئ جميل جدا ويارب يخلى لى اصحابى واقاريبى

الصدق
الامانة فى التعامل يعنى احب ان اكون بتعامل مع ناس وانا عارفة ان كلامهم صدق

الامان وده مش علطول بنحس بيه
الشغل بالنسبة لي ؟
أهم شئ في الدنيا
الكمبيوتر بالنسبة لي ؟
شئ لطيف لكن ان جيتوا للجد من ساعة ما جيبت الكمبيوتر بتاعى مافيش مرة كان عندى امتحان ولا لازم اقدم ريبورت الا لما يهنج والطابعة ما تشتغل وطبعا افضل محتاسة وشيلة الهم واول اما الامتحان يخلص واتصرف فى الريبورت من اى مكان الاقى الكمبيوتر بقدرة قادر يشتغل وزى الفل ماما بتقولى الكمبيوتر بتاعك للهلس وبس تصدقوا

التاج التاني
أية الخمس حاجات اللي محدش يعرفها عنك؟

انا بحس دايما ان مش كل اللى حوالى يعرفوا شخصيتى كلها انا بحس ان كل حد بيعرف الجزء المعرض له منى

- انا طيبة جدا يعنى ممكن اصدق حاجات هبلة جدا ودى مشكلة فظيعة

وساعات بحس انى بصدق علشان انا ببقى عايزة اصدق ناس معينة مهما قالوا

انا ساعات ما مباش عارفة.

-واحب اساعد الناس جدا باللى اقدر عليه كل اللى يعرفنى يعرف عنى الجدعنة

- لكن مع كده مش ممكن حد ياخد منى حاجة غصبن عنى لو انا مش عايزة اديك حاجة معينة مش هاديهالك مهما حصل.

- مش بحس ان انا ضعيفة خالصة انا مركزة جدا فى الحاجات اللى عايزها واللى مش عايزها بس ممكن الناس تاخد عنى فكرة انى ضعيفة بسبهم ياخدوها لانى ماحبش ادخل فى مهاترات لاقناع حد اللى عايز يقتنع بحاجة من الاول علشان انا معنديش طاقة.

- وحاجة كمان ياجماعة بس دى مع بابا وماما واخواتى فقط لاغير لما اببقى عايزة حاجة ببقى عارفة اذا كان هيوافقوا عليها ولا لا لو عارفة انهم هيرفضوا وانا مش عايزه اوى اصطدم بيهم وبتبقى زعلة

ولوانا عارفة انهم مش هيوافقوا عليها وانا عايزها اوى مفيش مانع اعرض الموضوع بطريقة ناعمة كده مع حبيت دلع وحنية والموضوع بيخلص فى ساعتها (ودى نصيحة منى ليكوا)

-سبحان الله هى حاجة غريبة اوى بحب حاجات ما ينفعش تتربط ببعض بحب الموسيقى الهادية والحياة الرومانسية الحالمة واقرا كتب وقصص رومانسية واتفرج على افلام اجنبية واعيط واموت نفسى عياط ومع ذلك مفيش مانع احب الاغانى الصاخبة واحب الرقص والتنطيط وما كونش فى مكان وتلاقيه هادى ابدا الا تلاقينى عاملة هيصة ودوشة والدنيا ما تبقاش ساكتة الا وانا مش موجودة وده حالى فى البيت والشغل وكل حاجة.

انا متشكرة جدا يا جماعه على التاجين دول ومش عارفة كلامى يتناسب معى اللى بكتبه ولا لا ربنا يستر عليا من اراءكم بس عايزها صريحة موت ولا يهمك انا شديدة واستحمل